Master en langues, cultures et médias - Lëtzebuerger Studien (académique)

Sprooch vun de Coursen: Lëtzebuergesch/Français/Deutsch

D’Lëtzebuerger Sprooch, Kultur, Literatur an d‘Medien an hirer Entwécklung an an hirem spezifesche gesellschaftleche Kontext stinn am Zentrum vun dësem Masterstudiegang.

De Master ass innovativ a senger Perspektiv,

• déi d’Lëtzebuerger Sprooch a Kultur an de méisproochegen a multikulturelle Kontext vum Land abett,
• déi berücksichtegt, wéi Kultur zu Lëtzebuerg duerch d’Medie wéi Film, Press, Tëlee oder Radio konstruéiert a reflektéiert gëtt

Objektiver

Envisagéiert ass d’Ausbildung vun Experten, déi net op eng Disziplin fixéiert bleiwen, mee interdisziplinäert Wëssen a Kompetenzen an de Gebidder vun der Lëtzebuerger Sprooch, der Kultur an de Medie matbréngen an och an der Beruffswelt uwenne kënnen. Ziler bis d’Enn vum Studium sinn deemno:

• verdéifte Kenntnisser an deene genannte Beräicher a Fächer
• en Abléck an déi wichtegst Methoden an Instrumenter vun de Sprooch- a Kulturwëssenschaften
• d’Kompetenz, spezifesch lëtzebuergesch Charakteristiken identifizéieren an ënnerscheeden ze kënnen, esouwéi den Afloss vun anere Kulturen zu Lëtzebuerg analyséieren an an der Perspektiv vun der Groussregioun, vun Europa an der Welt evaluieren a vergläichen ze kënnen
• d’Fäegkeet, kritesch ze urteelen esouwéi eegestänneg a wëssenschaftlech ze schaffen
• d’Kompetenz, d’Wëssen iwwert déi lëtzebuergesch Sprooch, Literatur a Kultur weiderzeginn

Liene mat der Recherche an der Beruffswelt

• Zesummenaarbecht mat den Equipen aus der IPSE-Fuerschungseenheet a mam Programm „Etudes Luxembourgeoises“ (P7)
• Zesummenaarbecht mat lëtzebuergesche Kultur- a Medieninstituter
• Invitatioun vu Fachleit aus der Beruffswelt an der internationaler Fuerschung

Berufflech Perspektiven

• Enseignement secondaire (Professer fir d’Lëtzebuergescht)
• Professer fir Sproochecoursen am Lëtzebuergeschen als Friemsprooch bei Jonken an an der Erwuessenebildung
• Recherche (Doktorat)
• Politesch a kulturell Institutiounen
• Redaktioun a Lektorat an den Editiouns- a Pressenhaiser, Theateraarbecht a -kritik

Viraussetzungen, fir ugeholl ze ginn

• E Bachelorofschloss an der Philologie (franséisch, däitsch oder englesch, o.ä.), an der Konscht, de Mediewëssenschaften, der Geschicht oder anere Kulturwëssenschaften
• Vun de Kandidate fir d’Professerscarrière ass e Bachelor an enger Philologie verlaangt.

Sproochenufuerderungen

Lëtzebuergesch, Däitsch a Franséisch (e gudden Deel vun de Coursë gëtt op Lëtzebuergesch gehalen). Passiv Kenntnisser am Englesche sinn néideg (fir d’Fuerschungsliteratur rezipéieren ze kënnen).

Maximum u Kandidaten : 20

Reseignementer

Dr. Melanie Wagner
Laboratoire de linguistique et de littératures luxembourgeoises
Faculté des Lettres, des Sciences Humaines, des Arts et des Sciences de l’Éducation
L-7201 Walferdange
melanie.wagner@uni.lu
T. +352 / 46 66 44 -6271

Secrétariat Lettres, Sciences Humaines
Brigitte Uhres
brigitte.uhres@uni.lu
T. +352 / 46 66 44 6212
F. +352 / 46 66 44 9604